(1)
Myen Asuya gaw shanhte hku nna sa gasat ai raitim, Mungkan hpe gaw
shanhte she KIO/KIA ni sa gasat shingtsang mana sha ai hku, kaning n
chye di nna nhtang gasat ai re lam hku zai ladat galaw nga masai. Bai
nna, shanhte mahtang she simsa lam grai sharawng ai zawn nga nna tsun
galaw shakut nga ai. (Kaja nga yang moi kawn shanhte shajin da nna gasat ai lam yawng chye chyalu rai sai)
(2) Anhte KIO/KIA hku nna, ninggawn mung masa gara hku mi nga tim, Gaphkat jahkring ai lam (Ceasefire) hpe tinang maga hku koi taw nga ai, ngu ai arawn alai hpe tsepkawp koi ra na re. Ahkyak ai gaw, Mung Shawa hte seng ai Mung Masa hpe n mai malap na re. Mungkan hku yu ai gaw, Mung Shawa hkra machyi ai hpe kadai ni grau yu ai, ngu ai hpe amat jaw nga ai. (Hpyen Yen ni hpe makawp maga ai hta KIO tsawm ra mi amyat lu mat ai lam ni nga sai.)
(3) Dai hte maren, Myen Asuya hpe gap hkat jahkring na matu, Mung Shawa law law (Myen, Kachin shara shagu na ni) garu ai lam byin lai wa sai. Dai hpe Myen Asuya gaw yau la masu nna amat la sai. Hluttaw kata kaw dawdan ai lam hpe Gumsan Magam wa hte Hpyen Jaubu wa ni bai kabu gara hkap la ndau masai, raitim, tatut shanhte n hkan galaw ai. Hpa mi nga nga, dai zawn ndau ai lam hpe Mungkan hku nna gaw kaja ai hku (Positive) hkap la sai. Dai hpe n mai malap ai. Tara shang ndau ai lam ahkyak dik re hpe n mai malap ai. Tinang jaw dum nna nga taw n mai ai.
(4) Dai majaw, matut nna gap hkat ra na mi raitim, KIO/KIA hku nna asan sha hkyak hkyak ndau ra ai lam langai nga ai. Dai gaw anhte mung gap hkat jahkring mayu sai, raitim, sa htim ai hpe gaw ninghkap gasat nga na re. Ngu nna ndau kau ra ai. (Kaja nan mung dai hku byin taw ai re hpe mu lu nngai).
(5) Gaphkat jahkring shagu, manang ni tsun ai de yau la mat ai hku n re ai sha, tinang galaw ra ai Mung Masa ninggam hta ngang ngang tsap nna mai jahta ai. Hpyen Masa hpe mung galoi raitim ninghkap lu na ja ja shagreng da mai nga ai.
(6) KIO/KIA kata na Mungchying shawa hpe n-gun bai kahkyin na matu gaphkat shazim tim mai kaja ai lam re, ngu nna myit lu nngai. (Asuya hku nna n shazim na zawn rai wa yang mung hpa n ra sai, shanhte kata kaw na Mung Shawa ni bai garu wa na ra ai.)
(7) Ndai majan a majaw, mahkrum madup grai lu sana re, ngu kam nngai. Dai majaw, matut nna, anhte sa wa ra na hkrun lam a matu tinang hkum tinang kam ai myit hte grau shajin lu wa na sai, ngu kam nngai.
* Jaw ai Mung Masa ngu ai gaw makoi magap n ra ai, galoi raitim branglang rai nna jahta let sa wa ga ngu nna, ndai shara kaw ka shabra dat nngai re.
No comments:
Post a Comment